پەرلەمانی کوردستان
Birêz Nêçîrvan Barzanî Serokê Herêma Kurdistanê, roja şemiyê 14.09.2024ê di serdana xwe ya Duhokê da, amadeyê nîşandana şanogeriya bi navê (Destana Kurdistanê) bû ku ev şanogerî li ser dîroka xebat û têkoşîna Kurd ya ji bo azadî û mafên gelê Kurdistanê bû.
Şanogeriya bi navê (Destana Kurdistanê) bi beşdariya zêdetir ji 200 hunermend û xebatkarên şanoyê hate lîstin ku, salek û heft mehan kar li ser hatiye kirin. Piştî bi dawî hatina nîşandana şanoyê, Serok Nêçîrvan Barzanî di peyvekê da destxweşiyê li berhemhêner, derhêner, lîstikvan û hemû kesên tê da beşdar bûn kir û spasiya wan kir.
Birêz Nêçîrvan Barzanî di axaftina xwe da behsa naverok û peyama şanoyê kir û ew weke bêhempa û şakarek hunerî bi nav kir ku dîrok û çîroka têkoşîna Kurd û gelê Kurdistanê vedibêje û hêvî xwest amadebûyên şanoyê ku xwendekarên zanîngehê bûn peyama wê wergirtibe.
Birêz Nêçîrvan Barzanî, herwiha, balkişand li ser aliyekî din yê vî karê hunerî û diyar kir ku destkeftên îro yên Herêma Kurdistanê bi hêsanî bi dest neketine, lê ji encama têkoşîneke dirêj û êş û azarên bêwestan yê nifşê berê ye û bal kişand ser israra gelê Kurdistanê ya li ser têkoşîn û berxwedanê ji bo bidestxistina mafên xwe, ji bona vê jî gelek şehîd û berdêl dane.
Serokê Herêma Kurdistanê di axaftina xwe da got ku, paşeroja welat emaneteke li ser milên ciwanên îro ye û bal kişand ser girîngiya xebata hunerî ji bo nasandina dîrok û doza rewa ya gelê Kurdistanê bi cîhanê ra. Di vî warî da hemû piştgiriya xwe ji bo van karên hunerî dubare kir.
