جێگری سه‌رۆک پێشوازیی لە باڵیۆز و کونسوڵی گشتیی ئیتاڵیا کرد

ئێوارەی ئەمڕۆ چوارشەممە 2024/12/4. بەڕێز شێخ جەعفەر شێخ مستەفا، جێگری سەرۆکی هەرێمی کوردستان، پێشوازیی لە بەڕێزان نيكۆلۆ فۆنتانا، باڵيۆزى نوێى ئيتاڵيا له‌ عێراق و میکێلی کامێرۆتۆ، کونسوڵی گشتیی ئیتاڵیا لە هەرێمی کوردستان، کرد.

لە دیدارەکەدا به‌ڕێز جێگری سەرۆک، پیرۆزباییی دەستبەکاربوونی لە بەڕێز فۆنتانا کرد و بە پێزانینیشەوە، باسی لە کارەکانی بەڕێز کامێرۆتۆ کرد کە لە ماوەی ڕابردوودا وەک کونسوڵی گشتیی ئیتاڵیا، ڕۆڵی گرنگی لە پەرەپێدانی پەیوەندییەکانی وڵاتەکەی لەگەڵ هەرێمی کوردستاندا، گێڕاوە.

لای خۆیەوە بەڕێز نیکۆلۆ فۆنتانا باڵيۆزى نوێى ئيتاڵيا، وێڕای دەربڕینی خۆشحاڵیی خۆی بە ئەرکە نوێیەکەی لە عێراق، لە گرنگیی بەردەوامیی پەیوەندییەکانیان لەگەڵ عێراق و هەرێمی کوردستاندا دوا و جەختی لە فراوانکردن و پەرەپێدانیان، کردەوە.