مستەفا سەید قادر جەخت لە پێویستیی بوونی هێزێکی یەکگرتوو بۆ هەرێمی کوردستان دەکاتەوە

News
- 10 February 2021

نیوەڕۆی ئەمڕۆ، چوارشەممە، 10 / 2 / 2021 بەڕێز مستەفا سەید قادر جێگری سەرۆکی هەرێمی کوردستان، پێشوازی لە بەڕێز میخال سڤۆبۆدا کونسوڵی گشتیی کۆماری چیک لە هەرێمی کوردستان کرد.

لە دیدارێکدا دۆخی ناوخۆی هەرێمی کوردستان و عێراق و چۆنیەتیی یەکخستنەوەی هێزەکانی پێشمەرگە و پەیوەندییەکانی هەردوولا و و پڕۆژەی چیک بۆ خوێندنی باڵا لە هەرێمی کوردستان و دۆخی تەندروستی و پەتای کۆڤید_١٩ و ڤاکسینەکەی، خرایە بەر باس.

بەڕێز جێگری سەرۆک سەبارەت بە کێشەکانی هەولێر – بەغدا ڕایگەیاند باشترە هەموو هەوڵەکان بۆ ڕێککەوتن بێت، بەڵام ئەگەر ڕێککەوتن نەهاتە دی، پێویستە هەرێمی کوردستان پشت بە خۆی ببەستێت، هەوڵەکانی زیادکردنی داهات و چڕتر بکاتەوە و بەرنامەی چاکسازیی هەمەلایەنە بۆ هەموو بوارەکان جێبەجێ بکات و جگە لە نەوت و غاز، پیشەسازی و بازرگانی و کشتوکاڵ بکاتە یەکێک لە کۆڵەکە گرنگەکانی سەرچاوەی داهات.

لەبەرامبەردا بەڕێز میخال سڤۆبۆدا هاوڕابوو کە دەکرێت سەرچاوەکانی داهات فراوان بکرێن و هەرێمی کوردستان بۆ گەشەسەندن و پتەوکردنی دامودەزگاکانی بە تەنیا پیشت بە نەوت نەبەستێت و سەرچاوەکانی دی بۆ دابینکردنی پێداویستییە گشتییەکانی، فەراهەم بکات. هەروەها هەردوولا جەختیان لە گرنگیی یەکخستنی هێزەکانی پێشمەرگە کردەوە و چەندین پێشنیار و چارەسەریان بۆ دامەزراندنی هێزێکی هەرێمی، تاوتوێ کرد.