پەرلەمانی کوردستان
بڕیاری (688)ی ئەنجومەنی ئاسایشی نێودەوڵەتی لە 1991/4/5 لە ئەنجوومەنی ئاسایشی نەتەوە یەکگرتووەکان، پاڵپشت بە بەشی حەوتەمی دەستووری ڕێکخراوی نەتەوە یەکگرتووەکان دەرچوو، کە بریتی بوو لە بڕیاری ناوچەی دژە فڕین لە سەرووی هێڵی 36ەوە، ئەو بڕیارە دوای ئەوە هات کە ڕژێمی بەعسی لەناوچوو ڕاپەڕینەکەی بەهاری ساڵی 1991ی سەرکوت کرد و خەڵکی کوردستانی ڕووبەڕووی کۆڕەوێکی ملیۆنی کردەوە.
ئەمڕۆ 34 ساڵ تێدەپەڕێت بەسەر ئەم بڕیارە گرنگ و مێژوویییەی کە بووە هۆی پارێزگاریکردن لە خاک و نەتەوە و گەلی کوردستان، هەروەها بوو بە ئامرازێکی گرنگ بۆ بنیاتنان و گواستنەوەی خەباتی شۆڕشگێڕی بۆ قۆناغی ئەزموونکردنی کاری سیاسی و گەییشتن بە ئامانجە نەتەوەیی و مافە ڕەواکانی گەلێکی چەوساوە، لە هەمووی گرنگتر، دیاریکردنی سنووری جوگرافی و ڕێگریکردن لە دووبارە بوونەوەی کارەساتی تراژیدی و جینۆسایدکردنەوەی نەتەوەی کورد بوو.
بڕیاری (688)ی ئەنجوومەنی ئاسایشی نێودەوڵەتی، بۆ یەکەمجار هەڵبژاردنی پەرلەمانی کوردستانی لە پرۆسەیەکی دیموکراسیدا بەرهەمهێنا و بووین بە خاوەن حکوومەتێکی خۆماڵی و گەییشتن بەم قۆناغەی ئەمڕۆ کە خاوەن قەوارەی هەرێمی کوردستانین.
لەم یادەدا، نابێت ڕۆڵی کاریگەر و پشتیوانیی کۆمەڵگەی نێودەوڵەتی و وڵاتانی وەک ئەمەریکا و بەریتانیا و فەرەنسا و ڕووسیا و چەند وڵاتێکی ترمان بیر بچێت، بۆیە هەمیشە سوپاسگوزاریانین، هەروەها سوپاسی هاوکاری و هەستی پڕ لە مرۆڤایەتیی وڵات و گەلانی ئێران و تورکیاش، بۆ واڵاکردنی سنوورەکانیان و لە ئامێزگرتن و حەواندنەوەی سەدان هەزار پەنابەری خەڵکی کوردستان دەکەین.
لێرەدا گرنگە پاڵپشتییە نێودەوڵەتییەکان بە گرنگ سەیر بکەین، ئەگەر بمانەوێ ئەم پاڵپشتیانە بەردەوامییان هەبێت، دەبێت ئاشتبوونەوە و یەکڕیزیی نێوان لایەنە سیاسییەکان بکەین بە بنەمای پاراستنی ئەو هەرێمەی کە پاڵپشت بە بڕیاری (688)ی ئەنجوومەنی ئاسایشی نێودەوڵەتی هاتە بوون، چونکە مەترسییەکان تاکوو ئێستاش هەڕەشەن بۆ پێگە و لەباربردنی هەرێمەکەمان.
شێخ جەعفەر شێخ مستەفا
جێگری سەرۆکی هەرێمی کوردستان
2025/4/5
