سەرۆکی دیوان بەشداری لە کۆڕێکی زانستیی کۆلیژی بابل بۆ لاهووت ـدا دەکات

ئێوارەی ئەمڕۆ پێنجشەممە 2026/11/5 لە زانکۆی کاتۆلیکی لە عەنکاوە، بەڕێز فەوزی هەریری، سەرۆکی دیوانی سەرۆکایەتیی هەرێمی کوردستان، لە کۆڕێکی زانستیی کۆلیژی بابل بۆ لاهووت، بە ناونیشانی (میراتی کەنیسەی ڕۆژهەڵاتی)، ئامادە بوو.

لە کۆڕەکەدا، کە ژمارەیەک لە کەسایەتیی ئایینی و ئەکادیمی ئامادەی بوون، بەڕێز سەرۆکی دیوان دەستخۆشیی لە پێشکەشکار و ڕێکخەرانی کۆڕەکە کرد و پشتیوانیی بۆ هەر جووڵە و چالاکییەکی زانستیی ئایینی کە خزمەت بە پەروەردەی تاک و پێشخستنی کۆمەڵگە و پتەوترکردنی پێکەوەژیانی ئاشتییانە بکات، دووپات کردەوە.

لای خۆیانەوە ڕێکخەرانی کۆڕەکە، وێڕای سوپاسگوزارییان بۆ ئامادەبوونی سەرۆکی دیوان، بە پێزانینەوە باسیان لە پتەویی لێبووردەییی ئایینی و نەتەوەیی لە هەرێمی کوردستان کرد و بە گرنگییەوە لە ڕۆڵ و بەشداریی پێکهاتە جیاجیاکانی هەرێمی کوردستان لە ژیانی گشتیدا، دوان.