پەرلەمانی کوردستان
ئەمڕۆ پێنجشەممە 2025/4/10 بەڕێز نووری عوسمان، سەرۆکی نووسینگەی سەرۆکی هەرێمی کوردستان، پێشوازیی لە بەڕێز ئەرمان تۆپچو، کونسوڵی گشتیی تورکیا لە هەرێمی کوردستان، کرد.
لە دیدارێکدا، ڕەوشی ناوخۆ و پەرەسەندنەکانی پرۆسەی پێکهێنانی کابینەی نوێی حکوومەت، خرانە بەر باس، لەمبارەیەوە بەڕێز سەرۆکی نووسینگە، وێڕای خستنەڕووی ئەنجامی گفتوگۆ و دانوستاندنەکان، هەوڵ و هەنگاوەکانی سەرۆکایەتیی هەرێمی کوردستانیشی بە ئاراستەی سەرخستنی پرۆسەکە، ڕوون کردەوە.
لە بەشێکی دیکەی گفتوگۆکانی دیدارەکەدا، دۆخی گشتیی ناوچەکە و پێشهات و ڕووداوەکانی تاوتوێ کران، تیایدا بیروڕا سەبارەت بە لێکەوتەکانیان ئاڵوگۆڕ کرا و جەخت لە پێویستیی هێورکردنەوەی گرژییەکان و پەنابردنە بەر گفتوگۆ و دانوستاندن بۆ چارەسەرکردنی کێشە و ئاڵۆزییەکان، کرایەوە.
پەیوەندییەکانی نێوان هەرێمی کوردستان و تورکیا و چۆنیەتیی پەرەپێدان و فراوانکردنیان لە کایە جیاجیاکاندا، تەوەرێکی دیکەی دیدارەکە بوو کە ژمارەیەک لە بەرپرس و ڕاوێژکارانی سەرۆکایەتی، ئامادەی بوون.
