جیگری سەرۆك پێشوازی لە كونسولی گشتیی فەرەنسا دەكات

پاشنیوەڕۆی ئەمرۆ سێشەممە 4/7/2023، بەڕێز مستەفا سەید قادر، جێگری سەرۆکی هەرێمی كوردستان، لە سلێمانی پێشوازی لە بەڕێز ئۆلیڤیێ دیکۆتینی، کۆنسولی گشتیی فەرەنسا لە هەرێمی کوردستان کرد کە بۆ ماڵئاوایی و کۆتایهاتنی ئەرکی لە هەرێمی کوردستان، سەردانی بەڕێز جێگری سەرۆكی كردبوو.

لە دیدارەکەدا بەڕێز جێگری سەرۆك سوپاس و پێزانینی خۆی بۆ ئەو كار و چالاکییانەی بەڕێز دیكۆتینی دەڕبڕی کە وەك كونسولی گشتیی فەرەنسا لە هەرێمی کوردستان ئەنجامی داون و هیوای سەركەوتنی بۆ خواست لە ئەرک و کاری داهاتوویدا.

جەخت كردنەوە لە برەودانی پەیوەندیییه‌کانی نێوان فەرەنسا و هەرێمی کوردستان و خستنەبەرباسی چەند بابەتێکی دیکەی پەیوەندیدار بە دۆخی سیاسیی ناوچەکە و عێراق و هەرێمی کوردستانەوە، تەوەرێکی دیکەی دیدارەکە بوون.