جێگری سەرۆک پێشوازی لە بەرپرسی نووسینگەی یەکێتیی ئەورووپا دەكات

ئەمڕۆ سێشەممە، ٢/٧/٢٠٢٤ بەرێز مستەفا سەید قادر، جێگری سەرۆکی هەرێمی کوردستان، پێشوازی لە تۆلگید بک، بەرپرسی نووسینگەی یەکێتیی ئەورووپا لە هەرێمی کوردستان کرد.

لە دیدارێکدا دۆخی سیاسی و ئەمنی و ئابووریی هەرێمی کوردستان و عێراق و ناوچەکە، بەرەوپێشچوونی پەیوەندییەکانی هەولێر - بەغدا و پرسی مووچە خرانە بەر باس و گفتوگۆ و لەمبارەیەوە هەردوولا لەسەر جێبەجێکردنی دەستووری عێراق وەک چارەسەری ڕیشەیی بۆ کێشە و ئاڵنگارییەکان، هاوڕا بوون.

دواتر بیروڕا سەبارەت پرسی هەڵبژاردنی پەرلەمانی کوردستان و گرنگیی ئەنجامدانی هەڵبژاردنێکی پاک و بێگەرد و گۆڕانکاریی سیاسی لە داهاتودا، ئاڵوگۆڕ کرا.

بەڕێز جێگری سەرۆک ستایشی پلان و کار و پرۆژەکانی یەکێتیی ئەورووپای لە هەرێمی کوردستان کرد بەتایبەت لە گرنگیدان بە سێکتەری پۆلیس و کردنەوەی خولی ڕاهێنان، هەروەها جەختی لە بایەخدان بە کوالیتی کۆنترۆڵ و سیستەمی بانکی بە ئامانجی پێشکەوتن و خزمەتکردنی زیاتری هاووڵاتییان، کردەوە.