پەرلەمانی کوردستان
لە واشنتۆن، بەڕێز شێخ جەعفەر شێخ مستەفا، جێگری سەرۆکی هەرێمی کوردستان، لەگەڵ بەڕێز ئەندرۆ دۆنیکا، یاریدەدەری سکرتێری کاروباری عێراق لە نووسینگەی کاروباری ڕۆژهەڵاتی ناوەڕاست لە وەزارەتی دەرەوەی ئەمەریکا ( بە وەکالەت) کۆبووەوە.
بەڕێز جێگری سەرۆک سوپاس و پێزانینی هەرێمی کوردستانی بۆ پاڵپشتی و هاوکارییەکانی ئەمەریکا بۆ عێراق و هەرێمی کوردستان دەربڕی، هەروەها ڕۆڵی هێزەکانی هاوپەیمانیی نێودەوڵەتیی دژ بە داعشی لەپێناو پاراستنی ئارامی و سەقامگیریی ناوچەکەدا، بە پێویست و کاریگەر لە قەڵەم دا.
لای خۆیەوە بەڕێز دۆنیکا دووپاتی کردەوە کە ئەمەریکا بەلایەوە گرنگە لەپێناو ئاشتی و ئارامیدا، بایەخی زیاتر بە ئازادی و دادپەروەری لە ڕۆژهەڵاتی ناوەڕاستدا بدرێت و جەختیشی لە بەردەوامیی پەیوەندییەکان و پەرەپێدانی هاریکاریی هاوبەش لەگەڵ عێراق و هەرێمی کوردستاندا، کردەوە.
ڕووداو و پەرەسەندنە هەرێمییەکان، تەوەرێکی دیکەی گفتوگۆکانی کۆبوونەوەکە بوو، تیایدا بیروڕا لەبارەی لێکەوتەکانیان بەسەر ناوچەکەوە، ئاڵوگۆڕ کرا.
