پەرلەمانی کوردستان
به‌ڕێز نێچیرڤان بارزانی سه‌رۆكی هه‌رێمی كوردستان جه‌ختى له خواستى هه‌رێمی كوردستان بۆ به‌ره‌وپێشبردنى زياترى په‌یوه‌ندییه‌كانى له‌گه‌ڵ هیندستان كرده‌وه و ئاماده‌يی هه‌رێمى كوردستانى بۆ پێشكه‌شكردنى هه‌موو ئاسانكارييه‌ك له‌مباره‌يه‌وه نيشان دا.
سه‌رۆك نێچيرڤان بارزانى نیوه‌ڕۆی ئه‌مڕۆ سێشه‌ممه 17/9/2019 له هه‌ولێر له كۆبوونه‌وه‌یه‌كیدا له‌گه‌ڵ به‌ڕێز ڤێرماڤالی مۆرالی دەھاران وەزیری دەوڵەتی هیندستان بۆ كاروباری دەرەوە و په‌رلەمان و شاندێكی یاوەری، پوخته‌یه‌كی ده‌رباره‌ی قۆناغی ڕابردوو و ئێستای ناوچه‌كه، دۆخی ده‌ستی كاری هیندی له هه‌رێمی كوردستان و په‌یوه‌ندییه‌كانی هه‌ولێر ـ به‌غدا و بوونی ژینگه و یاسای له‌بار بۆ وه‌به‌رهێنه‌رانی بیانی له هه‌رێمی كوردستان، پێشكه‌ش كرد.
لای خۆیه‌وه به‌ڕێز ده‌هاران پیرۆزبایيی ده‌ستبه‌كاربوونى له سه‌رۆك نێچیرڤان بارزانی كرد و سڵاوی به‌ڕێزان سه‌رۆك و سه‌رۆك وه‌زیرانی هیندستانی پێگه‌یاند، هه‌روه‌ها پێزانينى وڵاته‌كه‌ى بۆ قوربانیدانی گه‌لی كوردستان له شه‌ڕی دژی تیرۆر و خواستى وڵاته‌كه‌ى بۆ به‌ره‌وپێشبردنی په‌یوه‌ندییه‌كانی له‌گه‌ڵ عێراق و هه‌رێمی كوردستان دووپات كرده‌وه.
تاوتوێكردنی گرنگیی بوونی گه‌شتی ڕاسته‌وخۆى ئاسمانى له‌نێوان هه‌رێمی كوردستان و هیندستان، كاری هاوبه‌ش بۆ له‌ناوبردنی تیرۆر، دیاریكردنی بواره‌كانی كاری هاوبه‌ش له كه‌رته جیاوازه‌كاندا، دۆخی ده‌ستی كاری هندی و هاوكاريی هه‌رێمی كوردستان بۆیان، هه‌روه‌ها ڕێوڕه‌سمی په‌رده‌لادان له‌سه‌ر په‌یكه‌ری غاندی له پاركی شه‌هید سامی عبدالرحمن له هه‌ولێر، لایه‌نێكی دیكه‌ی كۆبوونه‌وه‌كه بوو.
