پەرلەمانی کوردستان
زۆر به توندى سه‌ركۆنه‌ى ئه‌و هێرشه مووشه‌كييه ده‌كه‌م كه ئه‌مڕۆ چوارشه‌ممه هێزه‌كانى هاوپه‌يمانيى نێوده‌وڵه‌تى به سه‌ركردايه‌تيى ئه‌مه‌ريكا له بنكه‌ى عه‌ينولئه‌سه‌دى ئاسمانى له پارێزگاى ئه‌نبار له عێراق كرده ئامانج و له ئه‌نجامدا به‌ڵێنده‌رێك گيانى له ده‌ست دا. سه‌ره‌خۆشى له خانه‌واده و كه‌سوكارى قوربانييه‌كه ده‌كه‌م، له‌م كاته سه‌خته‌دا هاوسۆز و هاوخه‌ميانم.
دووباره‌بوونه‌ى به‌رده‌وامى په‌لاماردان و هێرش له‌سه‌ر هێزى هاوپه‌يمانيى نێوده‌وڵه‌تيى دژى داعش كه له‌سه‌ر داواى حكوومه‌تى عێراقى فيدرأڵ بۆ پشتگيرى و هاوكاريكردنى له به‌ره‌نگاربوونه‌وه‌ى تيرۆر له عێراقن، به ته‌واوى دژى به‌رژه‌وه‌ندييه‌كانى عێراقه و ئارامى و سه‌قامگيريى وڵات و ئێستا و داهاتووى ده‌خاته مه‌ترسييه‌كى ڕاسته‌قينه‌وه.
بێگومان عێراق له دۆخى ئێستايدا هێشتا پێويستى به به‌رده‌واميى هاوكارى و يارمه‌تيدانى ئه‌مه‌ريكا و هاوپه‌يمانيى نێوده‌وڵه‌تييه بۆ ڕێگرى له به‌هێزبوونه‌وه‌ى داعش و له‌ناوبردنى يه‌كجاره‌كيى ئه‌و ڕێكخراوه تيرۆرستييه‌ى ڕۆژ به ڕۆژ هه‌ڕه‌شه و مه‌ترسييه‌كه‌ى زياتر ده‌بێت و كرده سه‌ربازييه‌كان و جموجووڵه تيرۆرستييه‌كانى فراونتر ده‌بن.
داوا له حكوومه‌ت و په‌رله‌مان و هێز و لايه‌نه سياسييه‌كان و پێكهاته و گه‌لانى عێراق ده‌كه‌م به‌رامبه‌ر ئه‌م هێرش و په‌لامارانه بێنه ده‌نگ و ڕێگه نه‌درێت له‌سه‌ر حيسابى به‌رژه‌وه‌ندييه‌كان و داهاتووى ئه‌وان، عێراق بكرێته گۆڕه‌پانى پێكدادان و يه‌كلاكردنه‌وه‌ى ململانێكان.
نێچيرڤان بارزانى
سه‌رۆكى هه‌رێمى كوردستان
2021/3/3
