پەرلەمانی کوردستان
ئەمڕۆ پێنجشەممە 2026/1/22 بەڕێز فەوزی هەریری، سەرۆکی دیوانی سەرۆکایەتیی هەرێمی کوردستان، پێشوازیی لە بەڕێز لیو جون، كونسوڵی گشتیی كۆماری میللیی چین لە هەرێمی کوردستان و شاندێکی یاوەری، کرد.
لە دیدارێکدا، کە بەڕێز نیاز ساڵح، سەرۆکی فەرمانگەی کاروباری دەرەوە و دیپلۆماسی لە سەرۆکایەتی، ئامادەی بوو، پەیوەندییە هەمەلایەنەکان و کایەکانی هاریکاریی هاوبەشی نێوان هەردوولا خرانە بەر باس و وێڕای جەختکردنەوە لە گرنگیی بەردەوامبوونیان، بیروڕا سەبارەت بە چۆنیەتیی پەرەپێدان و فراوانکردنیان، ئاڵوگۆڕ کرا.
لە بەشێکی دیکەی گفتوگۆکانی دیدارەکەدا، باس لە ڕەوشی گشتیی عێراق و پەرەسەندنەکانی کرا، تیایدا ئاڵنگارییەکانی بەردەم پرۆسەی سیاسی لە وڵات و هەوڵەکان بۆ تێپەڕاندنیان تاوتوێ کران، لەمبارەیەوە، پێویستیی هاتنەکایەی لێکگەیشتنی هاوبەش لەنێوان پێکهاتە و لایەنەکان لەپێناو سەقامگیریی سیاسی لە عێراق بە ئاراستەی پێکهێنانی دامەزراوە دەستوورییەکانی، دووپات کرایەوە.
ئاڵۆزییە هەرێمییەکان و کاریگەریی ڕووداوە هەنووکەیییە سەربازییەکان بەسەر سەقامگیریی ناوچەکەوە، تەوەرێکی دیکەی گفتوگۆکانی دیدارەکە بوو.
