سەرۆکی دیوان پێشوازیی لە کونسوڵی گشتیی بەریتانیا کرد

ئەمڕۆ دووشەممە 2024/10/28 بەڕێز فەوزی هەریری، سەرۆکی دیوانی سەرۆکایەتیی هەرێمی کوردستان، پێشوازیی لە بەڕێز ئه‌ندرۆ بيزڵى، كونسوڵى گشتیی به‌ريتانيا له‌ هه‌رێمى كوردستان، کرد.

لە دیدارێکدا، باس لە هەڵبژاردنی پەرلەمانی کوردستان و قۆناغی دوای ڕاگەیاندنی فەرمیی ئەنجامەکان کرا. لەمبارەیەوە، وێڕای بە سەرکەوتوو وەسفکردنی پرۆسەکە، بیروڕا سەبارەت بە هەنگاوی دواتر، کە گفتوگۆی لایەنەکانە بۆ پێکهێنانی حکوومەت، ئاڵوگۆڕ کرا.

پەیوەندییەکانی هەولێر ـ بەغدا و کێشە هەڵواسراوەکانی نێوانیان، هەروەها دۆخی عێراق و ڕەوشی گشتیی ناوچەکە، بەشێکی دیکەی گفتوگۆکانی دیدارەکە بوو.