پەرلەمانی کوردستان
ئەمڕۆ چوارشەممە ٢٠٢٢/٣/١٦ بە ئامادەبوونی بەڕێز شێخ جەعفەر شێخ مستەفا، جێگری سەرۆکی هەرێمی کوردستان، لە ڕێوڕەسمێكدا ڕێکخراوی ئاشتیی خێرخوازیی نێودەوڵەتی، دە هەزار دەرزی بێهۆشکردنی بۆ هۆڵی نەشتەرگەریی نەخۆشخانەی شۆڕش و بەڕێوەبەرایەتیی تەندروستیی هەڵەبجەی شەهید دابین كرد.
لە ڕێوڕەسمەكەدا بەڕێز جێگری سەرۆک جیا لە سوپاسكردنی ڕێکخراوی ئاشتیی خێرخوازیی نێودەوڵەتی بۆ دابینكردنی ئەم هاوكارییە، هەروەها هەوڵ و ماندووبوونیانی بەرز نرخاند و ئەم كارەی ڕێكخراوەكەی بە كارێكی مرۆڤانە و هەستكردن بە بەرپرسیاریه‌تیی ناساند و هیوای سەرکەوتنی بۆ خواستن.
لای خۆیانەوە ڕێکخراوی ئاشتیی خێرخوازیی نێودەوڵەتی، پێشکەشکردنی ئەو هاوکارییەیان وەک ئەرکێک بۆ خزمەتکردنی کەرتی تەندروستی نیشان دا و بەردەوامیی هاوكارییەكانیشیان لە دابینکردنی پێداویستیی تەندروستی بۆ پێشمەرگە و کەسوکاری شەهیدان، دووپات كردەوە.
