پەرلەمانی کوردستان
لە یادی (١٢٦)ەمین ساڵەی ڕۆژی ڕۆژنامەگەریی کوردی و دەرچوونی یەکەمین ڕۆژنامە لە ساڵی ١٨٩٨ بە ناوی (کوردستان) لەسەر دەستی میر میقداد مەدحەت بەدرخان، لە هەمان کاتدا ساڵیادی دامەزراندنی سەندیکای ڕۆژنامەنووسانی کوردستان، پیرۆزباییەکی گەرم لە سەرجەم ڕۆژنامەنووسان و ڕاگەیاندنکاران دەکەم، هیوای سەرکەوتنیان بۆ دەخوازم.
پیشەی ڕۆژنامەگەری و کاری میدیایی، بریتیيە لە بەدەستهێنان و بەخشینی زانیاريی دروست بە پشتبەستن بە سەرچاوەی باوەڕپێکراو، لە هەر شوێنێکی جیهانیشدا میدیای ئازاد و ڕاگەیاندنکار و ڕۆژنامەنووسی پیشەیی و ڕاستگۆ لە ئاست بەرپرسیارێتیيەکەیدا هەبێت ئەوا کۆمەڵگەیەکی هۆشیار و خاوەن متمانەی لێ بەرهەم دێت.
لەم بۆنەیەدا بە بایەخەوە لە کار و چالاکییەکانی بواری ڕۆژنامەگەری و نووسەران و ڕۆشنبیرانی هۆشیار و بوێر دەڕوانین، هیوادارم کاری ڕۆژنامەگەری و ڕاگەیاندنکاری پیشەیيیانە لە چوارچێوەی یاسا بەرکارەکان و پێوەرە نێودەوڵەتییەکاندا برەوی زیاتر بەخۆیەوە ببینێ، هەروەها دوور لە ململانێ سیاسییەکان و بەرتەسککردنەوەی کاری ڕۆژنامەوانی بواری زیاتریان بۆ بڕەخسێنرێت، لەپێناو گەیاندنی ڕاستی و دروستیی بابەتەکان و هۆشیارکردنەوەی کۆمەڵگەدا.
لە کۆتاییدا سڵاو لە گیانی پاکی سەرجەم ئەو ڕۆشنبیر و خاوەن قەڵەمە بوێرانەی کە لە ڕێگای کاروانی ڕۆژنامەگەریدا گیانی خۆیان کردە قوربانی، لەپێناو گەیشتن بە کیانێکی سەربەخۆ و کوردستانێکی ئارام.
شێخ جەعفەر شێخ مستەفا
جێگری سەرۆکی هەرێمی کوردستان
٢٠٢٤/٤/٢٢
