پەیامی جێگری سەرۆک لە ساڵیادی جینۆسایدکردنی کوردانی فەیلیدا

(٤٤)ساڵ تێپەڕ دەبێت بە سەر جینۆسایدکردنی کوردانی فەیلیدا، لەم ڕۆژەدا بە شکۆوە یادی قوربانییانی ئەم تاوانە دژ بە مرۆڤایەتییە دەکەینەوە کە لەلایەن ڕژێمی عێراقەوە دووچاری کۆمەڵکوژی و ڕاگواستن و پاکتاوی ڕەگەزی هاتن.

کوردانی فەیلی مێژوویەکی دێرینیان هەیە لە ناوچەکەدا و پێکهاتەیەکی گرنگی عێراق و کوردستانن، هەر لە سەرەتای دروستبوونی دەوڵەتی عێراقەوە ستەمی زۆریان بەرامبەر کراوە، بە چەندین قۆناغی جیاواز دووچاری دەربەدەری و ڕاگواستن و بێسەروشوێنکردن بوونەتەوە و بێبەش کراون لە هەبوونی ناسنامە و مافە سەرەتاییەکانی ژیان.

ئەرکی سەرشانی حکوومەتی عێراقە کە لە ئاست بەرپرسیارێتیدا قەرەبووی ماددی و مەعنەویی کەسوکاری قوربانییانی ئەم تاوانە بکاتەوە، هەروەها گرنگە بەدواداچوونێکی زانستی و ئەکادیمییانە لەسەر ئاستی ناوخۆیی و نێودەوڵەتییەوە بکرێت بۆ بەدۆکیۆمێنتکردن و نووسینەوەی مێژووی کوردانی فەیلی و قوربانییەکانیان، چونکە جگە لە کوردبوونیان هیچ تاوانێکی دیکەیان نەبووە.

سڵاو لە گیانی پاکی شەهیدانی کوردانی فەیلی و سەربەرزی بۆ کەسوکارەکانیان.

شێخ جەعفەر شێخ مستەفا جێگری سەرۆکی هەرێمی کوردستان ٢٠٢٤/٤/٤