پەرلەمانی کوردستان
ئێوارهى ئهمڕۆ پێنجشهممه 2026/9/17 بهڕێز نێچيرڤان بارزانى، سهرۆكى ههرێمى كوردستان، له دهۆك بهشداریى له ڕێوڕهسمى دهرچوونى خولى حهوتهمى زانكۆى ئهمهريكيى كوردستاندا كرد كه به ئامادهبوونى بهڕێز مهسروور بارزانى، سهرۆكى حكوومهتى ههرێمى كوردستان و دايك و باوك و كهسوكارى دهرچووان و ژمارهيهكى زۆر له ميوانان، بهڕێوه چوو.
له ڕێوڕسمهكهدا سهرۆك نێچيرڤان بارزانى، وتهيهكى پێشكهش كرد، ئهمه دهقهكهيهتى:
دەرچوویێن خۆشتڤى،
کەسوکارێن وان یێن ڕێزدار،
ڕێزداران سەرۆک و مامۆستایێن زانکۆیا ئەمهریکی يا کوردستانێ،
ئامادەبوویێن هێژا،
گەلەک دلخۆشم کو ڤێ ئێڤاريێ دگەل هەوەمە داکو پێکڤە بهشدارييا شادى و ڕێورەسمێن دەرچوونا خولا حەفتێ یا زانکۆیا ئەمهریکی يا کوردستانێ و (122) گەنجێن هەرێما کوردستانێ، عیراقێ و دەڤەرێ، بکەین.
ژ دل پیرۆزباهیێ ل هەوە، ل مالباتێن هەوە، ل مامۆستایێن هەوە و ل هەمی وان کەسا دکەم یێن کو پشتەڤانێن هەوە بووین هەتا هوين گەهشتینە ئەڤرۆ و ههوه چەندین بهشێن گرنگ یێن زانکۆیێ ب دويماهی ئیناین.
دەرچوون نە دويماهییا فێربوونێیە، بەلکى دەستپێکا قۆناغەکێیە کو تێدا بەرپرسيارییا هەوە بەرامبەر ههلبژاردهيێن هەوە و بەرامبەر ڕۆڵ و کارتێکرنا هەوە ل سەر جڤاکێ و وەلاتێ هەوە، زێدەتر و مەزنتر دبیت. لەوما ڤێ ئێڤاريێ من دڤێت هندەک بەحسێ وێ بەرپرسياریێ بۆ هەوە بکەم.
جيلێ مە د قۆناغەکا گەلەک گران و دژوار یا دیرۆکا کوردستانێ ڕا دەرباز بوو. ل هەمبەر بەرپرسيارییا پاراستن، ئاڤەدانکرن، جێگیرکرنا دهزگههـ و سازييان و ڤەکرنا دەرگەهێن وەلاتی بووین؛ بهسهر دەڤەرێ و جیهانێدا. گەلەک دەستکەفتێن مەزن هاتینە بدەستڤەئینان کو جهێ شانازییا مە هەمییانە، لێ گەلەک كار ژی ماینە کو ئەرکێ هەوە و جيلێ داهاتییە، ئەنجام بدەن.
وەلاتێ بهێز، نه ئەو وەلاتە یێ شاشیێ ناکەت. وەلاتێ بهێز ئەوه یێ کو دشێت شاشى یێن خۆ ببینیت، دانوستاندنێ ل سەر بکەت، ژ وان فێر ببیت و وان ڕاستڤهكهت و بهرهڤ داهاتى بچيت.
پەیاما زانکۆیێ نە ئەوە بتنێ هەوە فێر بکەت کا دێ چەوا بەرسڤا پرسیاران دەن. بەلکى ههوه فێر دکەت کا دێ چەوا ل دویڤ ڕاستیێ گەڕیێن و تشتا باشتر لێ بکەن. وە بکەت كو ب ئەقڵێ خۆ هزر بکەن، پرسیارا بکەن، دویڤچوونێ بکەن و ب بەرپرسياریڤە بۆ چێکرن و باشترکرنێ، ڕەخنێ بگرن. چونکی ڕەخنا بەرپرسانه، کوردستانێ بێهێز ناکەت، بەلکى دێ كوردستانێ پێش ئێخیت.
دەرچوویێن خۆشتڤی،
دلسۆزییا دروست بۆ وهلاتێ مه، ڕێزگرتن ل خوینا شەهیدان، ل خەبات و تێکۆشانا پێشمەرگێت قههرهمانێت مه كو ئهڤرۆ ب سايێ سهرێ خهباتا وان ئەم گەهاندینە ئەڤرۆ، هەروەسا ڕێزگرتن ل وێ چەندا هەتا نوکە هاتییە ئاڤاکرن، بتنێ ب پاراستن و هێلانا وێ وەکی خۆ نابیت، بەلکى ب وێ چەندێ دێ بيت ڕێزێ لێ بگرن کو هوین باشتر بکەن. دلسۆزییا دروست ئەوە کو دەستکەفتێن باش بپارێزین و دهسكهفتێن ديتر باشتر لێ بکەین.
ڕێزگرتن ل خەباتا جيلێ بەری نۆکە، نە ئەوە هوین بتنێ کۆپییا جيلێ بهرێ بكهن. بەرپرسيارییا هەوە، ئەوە كو هوین وا تشتا ببینن یێن مە نەدیتی، وان چارەسەرییا ببینن یێن مە نەدیتی و وا تشتا ئاڤا بکەن یێن ئهم نەشیاینه ئاڤا بکەین. ئەڤ چەندە ژی د جیهانەکێدا کو گەلەک بلەز يا دهێتە گوهۆڕین، گەلەک یا بنەڕەتییە.
تەکنەلۆژيیا پێشکەفتی، (ئهى ئاى)، شێوازێ فێرکرنێ، کارکرنێ، ئابووریێ، نۆژداریێ و گەلەک بابەتێن دی یێن کو ئەڤرۆ نه د هزرا مهدانه، دێ گوهۆڕیت. چێنابیت ئەم بتنێ بكارهێنهرێت ڤێ پێشکەفتنا تەکنەلۆژی بين، بەلکى دڤێت ب زانست و ڤەکۆلین و داهێنانێ، بهشداریێ تێدا بکەین.
لەوما تەکنەلۆژیا و (ئهى ئاى) بکار بینن و پێش بێخن، لێ وا پرسان نهدهنه دهستێت وێ یێن کو دڤێت بتنێ وەک بەرپرسيارییا مرۆڤا بمینن: ویژدان، بڕیاردانا ئەخلاقی و هەلگرتنا بەرپرسيارییا بڕیارێ. ئەڤ بەهایە نە تشتهكێ وهسانه كو بدهنه دەستێ ئامیران، بەلکى ناڤەڕۆک و جەوهەرێ مرۆڤاهییا هەوەنە.
دەرچوویێن هێژا،
تەکنەلۆژیا هەرچەندە پێش بکەڤیت، هندەک بەها هەنە چ جاران ناهێنه گوهۆڕين: وەکى کو دڤێت هوين دەستپاك بن، دلسۆز بن بۆ بەرپرسياریێن خۆ و زانینا خۆ بکەنە خزمەت و مفا بۆ خەلک و بۆ وەلاتێ خۆ، بۆ گەشەپێدانا فرەڕهنگیێ و بۆ پێکڤەژیانێ و بۆ ئاشتیێ د وهلاتێ مهدا.
سامانێ دروست د هزر و مهژيێ هەوەدایە، نە ل بن عەردی. سەرکەفتنا کەسی؛ یا گرنگە، لێ هنگى بەهایەکێ مەزنتر وەردگریت کو بێتە گوهۆڕین بۆ زانینێ، بۆ پرۆژەیان، یان بۆ چارەسەرکرنا ئاریشەیەکا جڤاکێ. سەرکردە بن، نە ب پۆست و ناڤونیشان، بەلکى ب بەرپرسياری و پێشەنگبوونێ د کریارێدا.
ئەم دێ چین و سوبەهی هوین دێ هێن، بێگومان گهلهك تشت ل ڤى وهلاتى هاتينه كرن، لێ ئەم کوردستانەکا تەمام و بێ کێماسی ڕادەستی هەوە ناکەین. ئەوا ئهم ڕادەستی هەوە دکەین، ئەو بهشه یا جيلێ مە شیای ئاڤا بکەت، ب سەرکەفتن و ب ههمى کێماسییاڤە، دێ ڕادهستى جيلێ پشتى خۆ كهت.
ژ بەر هندێ، دەستکەفتێن جيلێ مە، نەکەنە سنوورێ خەون و ئارمانجێن جيلێ خۆ. زانینێ بەرهەم بینن، پرۆژە و کارێن نوى ئاڤا بکەن، تەکنەلۆژیایێ پێش بێخین و ژینگەهێ بپارێزن، پێگيری دەمى و ڕەوشتا کاری بن، داکو پێکڤە کوردستانێ ببەینە قۆناغا بەرهەمهێنان، داهێنان و كێبركێ دگهل جیهانێ.
ههروهسا تشتەکی ژی بپارێزن کو ڕەنگە کێمتر دیار بیت، لێ کارتێکرنا وێ؛ بۆ ههردهمهكێ ههيه:
مافێ هەوە یێ پرسیارکرنێ، جوداهییا بیروبۆچوونا و ڕەخنەگرتنێ، دگەل پاراستنا مافێ وی کەسێ ل تەنشت هەوە ڕاوەستای دهما کو دبێژیتە هەوە: ڕەنگە هوین شاش بن و ئهو بۆچوون يا دروست نهبيت.
مه دڤێت هوین کوردستانەکێ ئاڤا بکەن کو تێدا هەر جيلهك بشێت دویرتر ژ جيلێ بەری خۆ بنێڕیت، بۆ وان کەسا ژى یێن پشتی وی تێن، وەلاتێ خۆ ژ دهما بهرى خۆ باشتر بكهت. ئەڤە بەرپرسيارییا هەوەیە، ئەڤە ژی باوەرییا مه يا موکومه ب هەوە. ئهڤه ئهو ديتنه يا كو ئهڤ زانكۆيه ل سهر هاتيه ئاڤاكرن.
جارەکا دی پڕ ب دل پیرۆزباهیێ ل هەوە، ل هەمی گەنجێن دەرچوویێن کوردستانێ، ل خێزانێن هەوە، ل مامۆستایێن هەوە و ل زانکۆیا هەوە دکەم.
من دڤێت پیرۆزباهی و دەستخۆشیيهكا گهرم ل برايێ خۆ يێ خۆشتڤى ڕێزدار مەسروور بارزانی ئهميندارێ زانكۆيا ئهمهريكى يا كوردستانێ و ڤيژنا وی بكهم يا كو ئهڤرۆ ئهم دبينين بۆ دامەزراندنا ڤێ زانکۆیێ و پێشکەفتنا وێ جهێ ڕێز و پێزانينهكا زۆره. هیڤییا پاشەرۆژەکا پڕ سەرکەفتن و پڕ بهرههم بۆ هەوە دخازم.
ههمى لايهك جارهكا دى ب خێر بێن سهر چاڤا و زۆر سپاس.
