پەرلەمانی کوردستان
ئەمڕۆ نیو سەدە بەسەر واژۆکردنی ڕێککەوتننامەی یازدەی ئازاری ساڵی ١٩٧٠دا لەنێوان سەرکردایەتیی شۆڕشی ئەیلوول و حکوومەتی ئەوسای عێراقدا تێدەپەڕێت. ئەم ڕێککەوتنە دەستکەوتێکی گرنگی ئەو شۆڕشە مەزنە و بەرهەمی چەندین ساڵ خەبات و خۆڕاگری و قوربانیدانی گەلی کوردستان بووه به ڕابه‌رايه‌تيى بارزانيى نه‌مر لەپێناو مافە ڕەواکانیدا، هەر ئەو ڕێككەوتنەش بووە بەردی بناغەی هەموو ئەو دەسكەوتانەی دواتر بۆ گەلەكەمان هاتنەدی.
یادکردنەوەی ڕێککەوتننامەی یازدەی ئازار، ڕێزگرتنە لە مێژووی تێکۆشان و قوربانیدانی گەلەکەمان بۆ گەیشتن بە مافە ڕەواکانی. ئەم ڕێککەوتنە بەڵگەی ڕاستیی باوەڕی گەلی کوردستانە بە ڕێگەچارەی ئاشتیانە لە هەر کێشە و ململانێیەکدا، هاوکات وانە و پەندێکی مێژووییی گرنگیشە بۆ لایەنە سیاسی و پێکهاتەکانی عێراق کە هەمیشە بژاردەی دیالۆگ، لێکگەیشتن، ڕێزله‌يه‌كگرتن و باوەڕی بە مافەکانی یەکتر، تاکە ڕێگەی دروستە بەرەو ئاشتی و ئایندەیەکی گەش.
هەر لەم بۆنەیەدا جەخت لە سەر هەڵوێستی چارەسەرخوازانەی خۆمان دەكەینەوە و بە ئومێدین دۆخی عێراق بەرەو سەقامگیريی سیاسی هەنگاو بنێ، لەوپێناوەشدا وەك هەمیشە ئامادەی هەموو هاوكاری و پشتگیرییەكین.
بەرز و شکۆدار بێت یادی ڕێککەوتننامەی یازدەی ئازاری ١٩٧٠.
سڵاو لە شەهیدانی ڕێگای سەرفرازی و خەباتی ئاشتیخوازانەی گەلی کوردستان.
نێچیرڤان بارزانی
سەرۆکی هەرێمی کوردستان
10/3/2020
