پەرلەمانی کوردستان
ئەمڕۆ دووشەممە ٢٠٢٢/١/١٧ بەڕێز شێخ جەعفەر شێخ مستەفا، جێگری سەرۆکی هەرێمی کوردستان، پێشوازی لە بەڕێز مارک برایسۆن ریچاردسۆن باڵیۆزی بەریتانیا لە عیراق و بەڕێز دەیڤد هانت، کونسولی گشتیی بەریتانیا لە هەرێمی کوردستان و شاندێکی یاوەری کرد.
لە کۆبوونەوەیەکدا پەیوەندییەکانی بەریتانیا لەگەڵ عیراق و هەرێمی کوردستان، دوایین گۆڕانکاری و پێشهاته‌كانى عیراق، هەنگاوەکانی پێکهێنانی حکوومەتی نوێى فيدراليى عيراق، هەڵبژاردنی دەستەی نوێی سەرۆکایەتیی ئەنجومەنی نوێنەران، بارودۆخی ئەمنی و سەقامگیریی ناوچەکە، تاوتوێ کران.
بەڕێز جێگری سەرۆک، هیوای خواست پێکهێنانی حکوومەتی نوێی عیراق ڕەنگدانەوەی گشت پێکهاتەکان بێت لەپێناو پاراستنی سەقامگیری و دروستیی پرۆسەی سیاسی و دەستەبەرکردنی مافە ڕەواکانی خەڵک و چارەسەرکردنی هەموو ئەو ئاڵنگاریانەی کە پرۆسەی سیاسی لە عیراق پەکخستووە لەسەر بنەمای دەستوور، بەتایبەتيش کێشە هەڵواسراوەکانی نێوان بەغدا و هەولێر.
بەڕێز باڵیۆزی بەریتانیا لە عیراق، جەختی لە هەمامەنگی و برەودان بە پەیوەندییەکانی وڵاتەکەی لەگەڵ عیراق و هەرێمی کوردستان کردەوە، پاشان هەنگاوەکانی پرۆسەی چاکسازی و یەکخستنەوەی هێزی پێشمەرگەی بەرز نرخاند و دووپاتی کردەوە کە وڵاتەکەیان بەردەوام دەبێت لە هاریکاری و یارمەتییە سەربازییەکانی بۆ پێشمەرگە.
