پەرلەمانی کوردستان
ئەمڕۆ دووشەممە ٢٠٢٢/٤/٢٥ بەڕێز شێخ جەعفەر شێخ مستەفا، جێگری سەرۆکی هەرێمی کوردستان، پێشوازی لە بەڕێز کۆڵۆنێڵ تۆد بۆرۆس جێگری بەڕێوەبەری گرووپی ڕاوێژکاریی سەربازیی هاوپەیمانیی نێودەوڵەتی لە هەرێمی کوردستان و شاندێکی یاوەری کرد کە بە مەبەستی ماڵئاوایی و تەواوبوونی ئەرکەکەی سەردانی جێگری سەرۆکیان کردبوو.
لە کۆبوونەوەیەکدا دوایین پێشهاتە سیاسی و ئەمنییەکانی ناوچەکە و بەرەنگاربوونەوەی هەڕەشە و مەترسییەکانی داعش، پرۆسەی چاکسازی و یەکخستنەوەی پێشمەرگە، گرنگیی هاریکاری و هەماهەنگیی نێوان پێشمەرگە و سوپای عیراق، تاوتوێ کران.
بەڕێز جێگری سەرۆک سوپاسی ئەرک و ماندووبوونی بەڕێز کۆڵۆنێڵ تۆد بۆرۆسی کرد و هیوای سەرکەوتنی لە ئەرکی داهاتوودا بۆ خواست، هەروەها ڕۆڵی هێزەکانی هاوپەیمانيی نێودەوڵەتیی دژ بە داعشی بە گرنگ زانی لەپێناو سەقامگیری و دوورخستنەوەی مەترسییەکانی داعش لە عیراق و ناوچەکە و دووپاتی كردەوە كە ڕاوێژی نێوان لایەنە سیاسییەکانی عیراق و هەرێمی كوردستان دەبێتە پاڵنەرێک بۆ سەقامگیریی پرۆسەی ئاشتەوایی و بەرەوپێشچوون لە بەڕێوەبردنی دەوڵەتدا.
شاندی میوان جەختیان لە بەردەوامیی دیالۆگی ستراتیژيی نێوان عیراق و ئەمه‌ریکا و گرنگیی برەودان بە پەیوەندی و هاریکارییە سەربازییەکانیان بۆ پێشمەرگە کردەوە، بەتایبەت لە بواری مەشق و ڕاهێنان و کردنەوەی خولی ئەکادیمی، هەروەها پاڵپشتیکردنیان لە پرۆسەی چاکسازيی وەزارەتی پێشمەرگە و یەکخستنەوەی هێزی پێشمەرگه‌دا.
