پەرلەمانی کوردستان
ئەمڕۆ سێشەممە ٢٠٢٢/٥/١٠ بەڕێز شێخ جەعفەر شێخ مستەفا، جێگری سەرۆکی هەرێمی کوردستان، پێشوازی لە کۆڵۆنێڵ تۆد بۆرۆس و شاندێکی ڕاوێژکاریی سەربازیی هاوپەیمانیی نێودەوڵەتی لە هەرێمی کوردستان کرد.
لە کۆبوونەوەیەکدا، بەڕێز جێگری سەرۆکی هەرێم خۆشحاڵیی خۆی دەربڕی بەرامبەر بە تیمی تازەی ڕاوێژکارانی سەربازیی هاوپەیمانیی نێودەوڵەتی لە هەرێمی کوردستان و عیراق، هەروەها ڕۆڵی هێزەکانی هاوپەیمانيی نێودەوڵەتیی دژ بە داعشی لە ناوچەکەدا بەرز نرخاند و پشتگیری و هەماهەنگیی زیاتری هەرێمی کوردستانی لەگەڵ هێزەکانی هاوپەیمانان لە ناوچەکە دووپات کردەوە، دواتر تیشکی خستە سەر هەنگاو و بەرەوپێشچوونەکانی پرۆسەی چاکسازی و یەکخستنەوەی پێشمەرگە.
لای خۆیانه‌وه شاندی میوان جەختیان لە بەردەوامی و برەودانی زیاتر بە پەیوەندی و هاریکارییە سەربازییەکانیان لەگەڵ هەرێمی کوردستان کردەوە، هەروەها دووپاتیان کردەوە کە بەردەوام دەبن لە پاڵپشتیکردنی پرۆسەی چاکسازيی وەزارەتی پێشمەرگە بە ئامانجی یەکخستنەوەی پێشمەرگه و دامەزراندنی هێزێکی نیشتیمانیی یەکگرتوو.
