جێگری سەرۆک لەگەڵ شاندێکی پەرلەمانی کەنەدا کۆبووەوە

ئەمڕۆ چوارشەممە ٢٠٢٣/٨/٣٠ بەڕێز شێخ جەعفەر شێخ مستەفا، جێگری سەرۆکی هەرێمی کوردستان، پێشوازی لە شاندێکی پەرلەمانی کەنەدا بە سەرۆکایەتیی تۆم کیمیج کرد.

لە دیدارێکدا بەڕێز جێگری سەرۆک جەختی لە برەودانی زیاتری پەیوەندییەکانی نێوان هەرێمی کوردستان و کەنەدا کردەوە، هەروەها سوپاسی گەل و حکوومەتی کەنەدای کرد لە پاڵپشتی و هاریکارییەكانیان بۆ هەرێمی کوردستان و پێشمەرگە بەتایبەتی لە ڕووبەڕووبوونەوەکانی دژ بە تیرۆرستانی داعشدا.

لای خۆیانەوە شاندی میوان، وێڕای ستایشی پێشکەوتنەکانی هەرێمی کوردستان، جەختیان لە بەردەوامبوونی پەیوەندیی وڵاتەکەیان لەگەڵ عێراق و هەرێمی کوردستان کردەوە، هەروەها ئاسایش و سەقامگیریی سیاسیی عێراق و هەرێمی کوردستانیان بۆ ناوچەکە بە گرنگ زانی.