پەرلەمانی کوردستان
ئەمڕۆ چوارشەممە ٢٠٢٢/٧/٦ بەڕێز شێخ جەعفەر شێخ مستەفا، جێگری سەرۆکی هەرێمی کوردستان، پێشوازی لە بەڕێز کۆلۆنێڵ بۆڵس، بەرپرسی ڕاوێژکاریی سەربازيی هاوپەیمانیی نێوده‌وڵه‌تيى دژ بە داعش و شاندێکی یاوەری کرد.
لە کۆبوونەوەیەکدا دوایین گۆڕانکاری و پێشهاتەکانی دۆخی سیاسی و ئەمنیی عيراق، ڕۆڵی هێزەکانی هاوپەیمانیی نێودەوڵەتی، مەترسییەکانی داعش بۆ سەر ناوچەکە، پرۆسەی چاکسازی و ڕێکخستنەوەی هێزی پێشمەرگە، تاوتوێ کران.
بەڕێز جێگری سەرۆک، ڕۆڵی هاوپەیمانان لە ناوچەكە، هاریکاری و یارمەتییەكانیان بۆ پێشمەرگە، پاڵپشتییان بۆ پرۆسەی چاکسازی و یەکخستنەوەی پێشمەرگە بەرز نرخاند، هەروەها تیشکی خستە سەر پەلامار و مەترسییەکانی داعش و لەمبارەیەوە بوونی هێزی هاوبەش لەنێوان پێشمەرگە و سوپای عيراقدا بەمەبەستی دوورخستنەوەی مەترسییەکان و جێگیركردنی ئاسایش لەو شوێنانەی بۆشایيی ئەمنییان تێدايه، بە گرنگ زانی.
لای خۆیەوە بەڕێز کۆلۆنێڵ بۆڵس، جەختی لە خێراکردنی هەنگاوەکانی پرۆسەی چاکسازی و ڕێکخستنەوەی پێشمەرگە کردەوە و بە گرنگی زانی هەرێمی کوردستان خاوەن هێزێکی نیشتمانيی یەکگرتوو بێت.
