پەرلەمانی کوردستان
ئەمڕۆ دووشەممە ٢٠٢٤/٥/٢٠ بەڕێز شێخ جەعفەر شێخ مستەفا، جێگری سەرۆکی هەرێمی کوردستان پێشوازی لە به‌ڕێز کۆڵۆنێڵ لارس پێرسیکۆڤیسکی، فەرماندەی سەربازیی هێزی هاوپەیمانیی ئەڵمانیا و شاندێکی یاوەری کرد.
لە کۆبوونەوەیەکدا دوایین پێشهاتە سیاسی و ئەمنییەکان، مەترسییەکانی داعش و کاریگەرییان لەسەر سەقامگیریی ئاسایشی ناوچەکە، بەردەوامیی هاریکارییە سەربازییەکانی ئەڵمانیا بۆ پێشمەرگە، یەکڕیزی و یەکگرتووییی نێوان لایەنە سیاسییەکان و پرۆسەی چاکسازی و یەکخستنەوەی پێشمەرگە، تاوتوێ کران.
هەردوولا جەختیان لە بەردەوامی و برەودان بە پەیوەندییەکانی ئەڵمانیا و هەرێمی کوردستان کردەوە و هاوڕا بوون کە داعش مەترسییەکی جددییە بۆ سەر ناوچەکە، لای خۆیەوە بەڕێز جێگری سەرۆک سوپاسی هاوکارییە سەربازی و مرۆیییەکانی ئەڵمانیای بۆ هەرێمی کوردستان کرد، بەتایبەت لە شەڕی دژی تیرۆردا.
