پەرلەمانی کوردستان
ئەمڕۆ چوارشەممە ٢٠٢٢/٩/٧، به‌ڕێز شێخ جەعفەر شێخ مستەفا جێگری سه‌رۆکی هه‌رێمی کوردستان، پێشوازی لە بەڕێز مارشاڵ سامی سامپسۆن ڕاوێژکاری باڵای سەربازیی بەریتانیا بۆ کاروباری ڕۆژهەڵاتی ناوەڕاست و باکووری ئافریکا و شاندێکی یاوەری کرد کە بەڕێز دەیڤد هانت، کونسولی گشتیی بەریتانیا لە هەولێر یاوەریان بوو.
لە کۆبوونەوه‌یەکدا پەیوەندییەکانی بەریتانیا لەگەڵ عێراق و هەرێمی کورستان، دوایین پێشهاتەکانی دۆخی سیاسی و ئەمنیی عێراق و ناوچەکە، مەترسییەکانی داعش و جموجۆڵەکانیان لەو ناوچانەی بۆشاییى ئەمنییان تێدایە، پرۆسەی یەکخستنەوە و چاکسازی لە وەزارەتی پێشمەرگە، هاریکارییە سەربازییەکانی بەریتانیا و ڕاهێنان و مەشقەکانیان بە پێشمەرگە، گفتوگۆیان لەبارەوە کرا.
به‌ڕێز جێگری سەرۆک، هاوكارییە سه‌ربازییه‌کانی بەریتانیای بۆ پێشمەرگە بەرز نرخاند و خواستی هەرێمی کوردستانی بۆ پەرەپێدانی پەیوەندییەکان لەگەڵ بەریتانیا دووپات کردەوە، هه‌روه‌ها تیشکی خسته سه‌ر دوایین جمووجۆڵەکانی داعش و مەترسییەکانیان.
لەم سۆنگەیەوە ڕاوێژی نێوان لایەنە سیاسییەکانی عێراق و هەرێمی کوردستانی بۆ سەقامگیریی پرۆسەی ئاشتەوایی و بەرەوپێشچوونی ئیدارەدانی دەوڵەت و بەدیهێنانی خواست و داواکارییەکانی خەڵک، بە گرنگ زانی و جەختی لە پێویستیی عێراق و ناوچەکە بۆ پشتگیری و هاریکارییە سەربازیی و لۆجێستییەکانی هاوپەیمانان کردەوە و گرنگیی پرۆسەی چاکسازی و یەکخستەوەی پێشمەرگەی لە چوارچێوەی وەزارەتی پێشمەرگەدا بۆ ئێستا و داهاتوو بە پێویست زانی.
لای خۆیانەوە بەڕێز سامی سامپسۆن و شاندی یاوەری، جەختیان لە بەردەوامیی پاڵپشتیی وڵاتەکەیان بۆ پێشمەرگە کردەوە، هه‌روه‌ها خێراکردنی پرۆسەی چاکسازی و ڕێکخستنەوەی پێشمەرگە لە چوارچێوەی وەزارەتی پێشمەرگە لەپێناو بەدامەزراوەییكردن و دروستبوونی هێزێکی یەکگرتووی نیشتمانی، بە هەنگاوێکی ئەرێنی و گرنگ زانی.
