پەرلەمانی کوردستان
ئەمڕۆ یەکشەممە ٢٠٢١/٦/٢٧ بەڕێز شێخ جەعفەر شێخ مستەفا جێگری سەرۆکی هەرێمی کوردستان، پێشوازی لە بەڕێز کۆلۆنێل ساڤیریۆ ئەمۆرۆسۆ کۆماندەری هێزە ئیتالییه‌کان له هاوپەیمانیی نێوده‌وڵه‌تی لە عێراق و شاندێکی یاوەری کرد.
لە کۆبوونەوەیەکدا باس لە دوایین جموجۆڵەکانی داعش، بارودۆخی ئەمنیی ناوچەکە، ئۆپەراسیۆنە هاوبەشەکان بۆ سەر تیرۆریستان، دروستکردنی بنکەیەکی سەربازیی تایبەت بە مەشق و ڕاهێنان لە سلێمانی بۆ هێزەکانی پێشمەرگە کرا.
به‌ڕێز جێگری سەرۆک ستایشی هێزەکانی هاوپەیمانانی لە عێراق کرد کە هەماهەنگ و هاوکار بوون بۆ نەمانی یەکجارەکیی تیرۆریستانی داعش لە عێراق و ناوچەکەدا، هەروەها دروستکردنی بنکەیەکی سەربازیی تایبەت بە مەشق و ڕاهێنانی بۆ پێشمەرگە بە شێوەیەکی ئەکادیمی بۆ ڕووبەڕووبوونەوەی تیرۆریستان بە گرنگ پێناسە کرد، بەتایبەتیش کە ئێستا داعش بۆتە هەڕەشەیەکی مەترسیدار لە ناوچەکە و ئەو شوێنانەی بۆشاییی ئەمنیان تێدا درووست بووە بۆتە شوێنی حەشارگە و هۆکاری زیادبوونی کردەوە تیرۆریستییەکان.
لای خۆیەوە کۆماندەری هێزه ئیتاڵییه‌کان لە عێراق ڕۆڵی هەرێمی کوردستان و هێزەکانی پێشمەرگەی لە ڕووبەڕووبوونەوەکانی دژ بە داعش بەرز نرخاند و جەختی لەسەر هەماهەنگیی زیاتری سوپای عێراق و پێشمەرگە و پاڵپشتیی هێزەکانی هاوپەیمانی کرده‌وه، هەروەها بەردەوامبوونی ئۆپەراسیۆنە هاوبەشەکانی بۆ سەر بنکە و حەشارگە شاراوەکانی داعش بە گرنگ زانی بۆ نەمان و دوورخستنەوەیان لەو مەترسییانەی لە ناوچەکەدا بوونیان هەیە.
