پەرلەمانی کوردستان
ئەمڕۆ سێشەممە ٢٠٢٢/٤/٢٦ بەڕێز شێخ جەعفەر شێخ مستەفا، جێگری سەرۆکی هەرێمی کوردستان، پێشوازی لە بەڕێز بارت ڤان دێن هوڤڵ، ڕاوێژکاری باڵای سەربازيی هێزەکانی هۆڵه‌ندا له هاوپەیمانیی نێوده‌وڵه‌تيى دژى تيرۆردا کرد.
لە کۆبوونەوەکه‌دا بارودۆخی سیاسی و ئەمنیی عيراق، ڕۆڵی هێزەکانی هۆڵەندی لە چوارچێوەی هاوپەیمانیی نێودەوڵەتیی دژی داعشدا، مەترسییەکانی داعش بۆ سەر ناوچەکە، هاریکاری و پشتیوانيی هۆڵەندا بۆ چاکسازی و ڕێکخستنەوەی پێشمەرگە لەگەڵ وەزارەتی پێشمەرگە، تاوتوێ کران.
بەڕێز جێگری سەرۆک، ڕۆڵی هێزەکانی هۆڵەندای لە چوارچێوەی هاوپەیمانیی نێودەوڵەتیی دژى داعشدا بەرز نرخاند و ستایشی دەوڵەتی هۆڵەندای کرد سەبارەت بەو پاڵپشتی و یارمەتییانەی پێشکەشی وەزارەتی پێشمەرگەی دەکەن بۆ چاکسازی و یەکخستنەوەی پێشمەرگە، هەروەها تیشکی خستە سەر پەلامار و مەترسییەکانی داعش لە ناوچەکەدا. دووپاتيشی کردەوە کە بوونی هێزی هاوبەش لەنێوان پێشمەرگە و سوپای عيراقدا گرنگە بۆ دوورخستنەوەی مەترسییەکان و دابینکردنی سەقامگیری، بەتایبەتيش لەو شوێنانەی بۆشایيی ئەمنییان تێدايه.
لای خۆیەوە بەڕێز ڕاوێژکاری باڵای سەربازیی هۆڵەندا، جەختی لە خێراکردنی هەنگاوەکانی پرۆسەی چاکسازی و ڕێکخستنەوەی پێشمەرگە کردەوە، چونکە لە ئێستادا گرنگە بۆ هەرێمی کوردستان کە خاوەن هێزێکی نیشتمانيی یەکگرتوو بێت بۆ پاراستن و سەقامگیريی دۆخی ئەمنی و دوورخستنەوەی مەترسییەکان.
