پەرلەمانی کوردستان
ئەمڕۆ سێشەممە ٢٠٢٢/٤/١٩ بەڕێز شێخ جەعفەر شێخ مستەفا، جێگری سەرۆکی هەرێمی كوردستان پێشوازی لەبەڕێز کۆلۆنێڵ ئالێکساندەر شتومەر، کۆماندەری هێزی ئه‌ڵمانى له هاوپەیمانیی نێوده‌وڵه‌تيى دژى داعش و شاندێکی یاوەری کرد.
لە کۆبوونەوەیەکدا دوایین پێشهاتە ئەمنیەکانی ناوچەکە، مەترسییەکانی داعش، یارمەتییە سەربازییەکانی ئەڵمانیا بۆ پێشمەرگە، پرۆسەی چاکسازی و یەکخستنەوەی هێزەکانی پێشمەرگە و چەند پرسێکی جێی بایەخی هاوبەش، تاوتوێ کران.
بەڕێز جێگری سەرۆک ڕۆڵ و کاریگەریی هێزەکانی هاوپەیمانانی دژ بە داعش لە ناوچەکە بەرز نرخاند و سوپاسی هێزە ئەڵمانیییەكانی کرد بۆ ئەو هاریکارییانەی پێشکەش بە نەخۆشخانەی پێشمەرگەی دەکەن، هەروەها تیشکی خستە سەر ئەو هەنگاو و بەرەوپێشچوونانەی لە پرۆسەی چاکسازی و یەکخستنەوەی هێزەکانی پێشمەرگەدا هەیە.
شاندی میوان دووپاتیان کردەوە کە بەردەوام دەبن لە هاریکارییە سەربازی و لۆجستییەکانیان بۆ پێشمەرگە، هەروەها جەختیان لە هەماهەنگیی زیاتری نێوان پێشمەرگە و سوپای عیراق کردەوە بەمەبەستی پاراستنی ئارامی و سەقامگیریی ناوچەکە و کێوماڵکردنی ئەو شوێنانەی کە داعش خۆی تێدا حەشار داوە.
