پەرلەمانی کوردستان
ئەمڕۆ دووشەممە ٢٠٢١/٢/١٥، لە ڕێوڕه‌سمی ماڵئاواییی پێشمەرگە و سیاسەتمەدار د. ڕۆژ نووری شاوه‌یس كه لە پەرلەمانی کوردستان به‌ڕێوه چوو، تاجەگوڵینەی ڕێز و وەفای سەرۆکایەتیی هەرێمی کوردستان لەلایەن جێگری سەرۆکی ھەرێمی کوردستان بەڕێز شێخ جەعفەر شێخ مستەفاوه لەسەر تەرمی خوالێخۆشبوو دانرا.
د. ڕۆژ نووری شاوەیس لە بنەماڵەیەکی دیار و شورشگێر و ناوداری سلێمانی، سیاسەتمەدارێکی بە توانا، خاوەن کەسایەتییەکی کاریگەر لە گۆرەپانی سیاسیی کوردستان و لە ڕابردووشدا پێشمەرگە و فەرماندەیەکی ئازا و ھەڵکەوتوو بوو. بەردەوام ھەوڵی دەستەبەرکردنی ئاشتی و تەباییی نێوان پێکھاتە و لایەنە سیاسییەکانی کوردستانی دەدا، لەگەڵ لایەنە سیاسییەکانی کوردستان و عێراق، ھەروەھا لەسەر ئاستی نێودەوڵەتیش خاوەن پێگە و پەیوەندییەکی توندوتۆڵ بوو،دوای ڕاپەڕینیش پله‌كانی سەرۆک وه‌‌زیران و سەرۆکی پەرلەمانی کوردستانی به‌ڕێو بردووه.
