پەرلەمانی کوردستان
پێشنیوەڕۆی ئەمڕۆ چوارشەمە، ٧/١٢/٢٠٢٢، بەڕێز مستەفا سەید قادر، جێگری سەرۆکی هەرێمی کوردستان، لە ئۆفیسی سەرەکيی خۆی لە هەولێر، پێشوازی لە دەیڤید هەنت، کونسوڵی گشتيی بەریتانیا و شاندێكى یاوەری کرد.
لەو دیدارەدا کە کونسوڵی گشتيی بەریتانیا بەمەبەستی ماڵئاوایی و کۆتاییهاتنی ئەرکەکەی سەردانی جێگری سەرۆکی هەرێمی کردبوو، تيایدا باس لە بارودۆخی سیاسی و ئەمنيی هەرێمی کوردستان و عێراق و ناوچەکە کرا و پەیوەندییەکانی هەولێر و بەغداش خرایە بەرباس.
به‌ڕێز جێگری سەرۆک جەختی لە گرنگی و پاراستنی هەرێمی کوردستان کردەوە و بە بایەخەوە باسی لە بوونی دید و ستراتیژێکی نیشتمانی کرد.
لە درێژەی دیدارەکەدا، به‌ڕێز جێگری سەرۆک تێڕوانینی خۆی سەبارەت بە دۆخی ناوخۆی هەرێم و گوزەرانی خەڵک و چاکسازی خستە ڕوو. هەردوولا هاوڕا بوون لەسەر گرنگی و پەرەپێدانی زیاتری پەیوەندییەکانی نێوانیان لەسەر ئاستی کەلتووری و سیاسی و خوێندنی باڵا و ئابووری و بازرگانی و ڕەخساندنی زەمینەی زیاتر بۆ کۆمپانیاکانی بەریتانیا بۆ کارکردن لە هەرێمی کوردستان.
لە کۆتاییدا به‌ڕێز جێگری سەرۆک سوپاسی پشتیوانییەکانی بەریتانیا و هاوپەیمانانی کرد لەپێناو سەقامگیريی هەرێمی کوردستان و هەوڵەکانیان بۆ نەهێشتنی ناکۆکی و جیاوازییەکانی نێوان لایەنە سیاسیەکان، هەروەها باشترکردنی پەیوەنديیەکانی هه‌ولێر ـ بەغدا. به‌ڕێز کونسوڵی گشتيی بەریتانیا دووپاتی کردەوە کە ئەوان له پشتگيريى و هاوكاريكردنى هه‌رێمى كوردستان بەردەوام دەبن.
