پەرلەمانی کوردستان
به‌بۆنه‌ى كۆچى دواييى ڕۆشنبیر و نووسەر و ڕۆژنامەنووس و خەباتکاری ناسراوی عێراق عەدنان حسێن ـه‌وه، پرسه و سه‌ره‌خۆشى له خانه‌واده‌ى به‌ڕێزى خوالێخۆشبوو و كه‌سوكار و دۆست و هاوڕێيانى و ته‌واوى گه‌لانى عێراق ده‌كه‌ين و هاوخه‌ميانين.
عەدنان حسێن دۆستێکی دڵسۆز و ڕاستەقینەی دۆزی ڕەوای گەلی کوردستان و تێکۆشەرێکی بوێر و ماندوونەناسی بزاڤی دیموکراتی نیشتمانیی عێراق و قەڵەمێکی بە بڕشت و ناوێکی دیارى ڕووناکبیری و مەدەنیەتخوازی بوو. لەگەڵ باوەڕەکانی خۆی ڕاستگۆ بوو، هەر لەو پێناوەشدا ساڵانێک لە چیاکانی کوردستان شانبەشانی پێشمەرگە چەکی خەبات و ڕووبه‌ڕووبوونه‌وه‌ى کردە شان.
عه‌دنان حسێن بە هەڵوێست و بە قەڵەم و بە بیر و باوەڕی ڕۆشنگەرانەی، هەموو ژیانی خۆى بۆ ئازادی و دیموکراسی و دادوه‌ريى کۆمەڵایەتی و لێبوردەیى و لە دژی شۆڤێنیزم و دیکتاتوری تەرخان کرد، هەر لەو ڕوانگه مرۆيیەشەوە بە دڵ په‌رۆش و پشتیوانی گەلی کوردستان و مافە ڕەواکانی بوو. یاد و هەڵوێستەکانی، لە ویژدانی گه‌لى کوردستاندا بۆ هه‌ميشه بە زیندوویی دەمێنێتەوە.
گيانى ئه‌و شاد و سه‌بوورى و دڵنه‌وايى بۆ هه‌مووان.
نێچيرڤان بارزانى
سه‌رۆكى هه‌رێمى كوردستان
10/10/2019
