سەرۆک نێچیرڤان بارزانی لەگەڵ وەزیری دەرەوەی بەحرەین کۆدەبێتەوە

هه‌ر لە چوارچێوەی بەشداریکردنی لە کۆنفرانسی ئاسایشی میونشندا، ئێواره‌ى ئەمڕۆ هەینی 2025/2/14 بەڕێز نێچیرڤان بارزانی، سەرۆکی هەرێمی کوردستان، لەگەڵ بەڕێز د. عەبدوللەتیف بن ڕاشد ئەلزەیيانی، وەزیری دەرەوەی شانشینی بەحرەین کۆبووەوە.

هەردوولا پەیوەندییەکانی بەحرەینيان لەگەڵ عێراق و هەرێمی کوردستان تاوتوێ کرد و تیشکیان خستە سەر دوایین پێشهاتەکانی ناوچەکە، هەروەها باسيان له‌ چۆنيه‌تيى بەهێزکردنی هاوکاريی دوولايه‌نه‌ لە بوارە هاوبەشەکاندا كرد.

سەرۆک نێچیرڤان بارزانی جەختی لەسەر گرنگيی فراوانکردنی ئاسۆی هاوکاريی نێوان هەرێمی کوردستان و شانشینی بەحرەین لە بوارە سیاسی و ئابوورییەکاندا کردەوە، هه‌روه‌ها ئاماژەی بە ڕۆڵی هەرێمی کوردستان لە بەهێزکردنی سەقامگیريی ناوچه‌كه‌دا کرد.

لاى خۆیەوە، به‌ڕێز وەزیری دەرەوەی بەحرەین خواستى وڵاتەکەی بۆ بەهێزکردنی پەیوەندییەکانی لەگەڵ عێراق و هەرێمی کوردستان دەربڕی و ستایشی ڕۆڵی هەرێمی کوردستانی کرد لە پاراستنی ئاسایش و سەقامگیریی ناوچەکەدا.

هەروەها هەردوولا ده‌رباره‌ى دۆخی سووریا و چەند پرسێکی دیکەی جێی بایەخی هاوبه‌ش، بيروڕايان ئاڵوگۆڕ كرد.